2011年10月25日 星期二

大久保:飛越十八層

重新上載五年前經典之作,文章內容略作修改。




月前在某個飯局中,講到時下香港人,大多只懂吃自助餐.小弟突然爆左句,"有無興趣去大久保?!"既然身為全港最大飲食網站,第二大劣評最多的餐廳.一定有其"吸引力".無論點樣糟糕.自己未食過,好難去批判其水準.

天南地北咩野好野都食過晒,係時候來一些比吃蟲更加另類的飯聚,經麵包兄一吹,一呼百應,竟然有一打死士追隨.當中大多係高profile的食友,有些食友覺得唔係呀嘛?你地係咪玩野架?).擺明居馬,要去追求事實的真相.當中梗係有少少玩味在內.

十二個神風敢死隊成員,準時十點半,聚集在油麻地大久保門外.N兄之前book左房,一樣無得早到早入.要搭到正先入得.



入到門口,已索到陣劈場式煙味,加埋酸縮的臭味.聽講此味是大久保其中之一特色.十二死士,盡屈在一間狹窄細小的房子內.牆上的小電視,正是播著油尖旺348少男的夢中飛機情人Stephy的"獨家試愛",片中的愛情觀,同女主角的背景.與貴店的旺角味道,不謀而合.



咁大個仔,第一次見日本料理.用包裝芥辣奉客.一口熱茶,無味.呢兩味已經不像樣,可想而知,其後的食物,大約會係點.難怪有人來到只是五分鐘,未坐暖已經有點後悔...

眾人安頓後,已急不及待去點菜.有幾張點菜紙,每次只能揀三樣,睇之前眾食評,此店特色其中之一,就係漏單情況,經常發生,而且係故意的.S先生誇下海口如果唔漏單的話,我咩都得!)



求其點左一大輪,連自己都唔記得,反正這類放題垃圾.應該無邊樣係代表作.出乎意料,不消一會.加州卷同蟹子沙律已經上桌.比之前講話等成世都無得食之食評,似乎有點出入.


可能我們這個聚會已經黃晒.連餐廳都知我們這班來者不善的客人.所以餐廳負責人,連十皮都唔收,Sake任飲.

唔記得叫咩名的卷物,底部似條米芝蓮爆左tire.散左出黎.壽司飯無味,質感似比機器啤死.加州卷無吃到,不知食味如何.蟹子沙律,經典之作.從未吃過如此酸的沙律,沙律醬是否過左期?細細碟,一樣食得剩.可想而知,有幾咁難食.



眾手卷當中,無樣掂.唔知咩魚刺身,味如嚼蠟.微腥.紫菜唔脆,壽司飯一樣無味.另外個鮑魚,食味如發泡膠.感覺極為硬膠.本來想點些豉油,撈埋吃落肚便算.隔離異口同聲話樽醬油很臭.結果還是作罷.



再講下其他壽司,刺身.點下玉子,赤貝,吞拿魚等壽司.刺身就甜蝦,北寄貝,三文魚(?!!)等等,仲有一些自己都唔記得的魚類.



去到吞拿魚壽司,之前某食友講過話壽司未上檯,會好像華航客機般自動解體.今次親眼所見,一夾上筷子,即刻肉還肉,飯還飯.兩者一夜情過後,事後煙都未吸,涼都未沖就著衫走人.吞拿魚紅得有點假.無味.連我自己都唔知食緊乜.



其他刺身,都係一個味,無味.好有理由相信,這處的刺身,應該會係在普光齋交來的貨色.港人熱愛之三文魚,再一次重申,吃得多三文魚,等如慢性自殺.今時今日的三文魚,十居其九係養殖貨,野生一早囉去做高級煙三文魚.養殖者為左肉質更加紅潤.在飼料中,加上一些可令到肉質紅潤,但對人體有害的色素.吃得多會點?你試下咪知,咩野Omega 3?騙人的,食到你吹BB就真.變壞的三文魚,係唔會比面色你睇的.有時睇到某些食評,講到三文魚切得厚厚,好新鮮,好好味.真係睇到笑出黎.恕我唔識欣賞.


熟食方面,冷麵係其中一味,比較正常的菜式.自助鐵板燒,柴娃娃點幾種配料,用舊牛油在窩內捽下捽下.待其熔化後,放下金菇牛肉卷,帶子,蝦等材料.



燒到兩面變色便可,有人見到尚有少少生,即刻喝止唔好食住,席上有人好有信心,照食可也.牛肉卷也過得去.呢樣真係好難唔好食.蝦肉霉死,比基圍蝦更低層次.帶子絕對唔新鮮.咬落成口粉.真係恐X怖.


店方無私奉送的清酒,本來不存厚望係什麼國色天香.入口,味如廣東米酒!洗拿馬邦高利.難得眾食友,照喝不誤.做死士做到底,貫切至終,難得難得.



炒烏冬無可能會係手打貨色.入口如吃麵粉.令人費解,不過這是大久保,本來匪夷所思,已經變成理所當然.




一眾炸燒物,咖喱薯餅味道怪怪咁,



炸餃子應該係全夜之中,最好吃的一味,因為唔係自己包.同老麥最好吃的炸薯條原理一樣.沙爹豆腐,兩者互不相干.沙爹汁味薄弱,豆腐全不入味.燒雞軟骨,無可能整得難食,因為本身係無味的.燒豬肉串,都過得去,當然同南蠻亭等貨色,差得遠矣.

吃到此段,小弟要上班,提早畢業完成任務.不知後尾其他食友仲有無其他追加菜式?

十二死士,全部沙場老將,難得此夜面對如此"美食",一樣興高彩烈,所有批判之聲,全部當成笑話聽之.非常盡慶,並非用錢能買下.真是此刻無價.

大久保等此類垃圾放題,有如街頭騙案如祈福黨,寶藥黨,或者傳銷賣香薰等.野草吹不盡,春風吹又生,生命力之強,令人乍舌.長年累月,仲有大把人落疊.

呢篇加埋的文字加相片,應該係大久保史上,最詳盡之食評.如果睇完我咁寫都仲鍾個頭埋去的話,阿呢陀佛.除非,你同我地一樣,有自虐狂,想睇下點衰.真係睇番之前貴店之笑面,都唔知係咪媒?!

大久保:彌敦道567號銀座廣場地下(已結業)

延伸閱讀:明將破地獄 http://foodie-smashingpumkins.blogspot.com/2011/08/2009.html

沒有留言:

張貼留言

Related Posts Plugin for WordPress, Blogger...