倫敦：Notting Hill一點雜碎

 

與好友由South Kensington坐車到Notting Hill，一個我超過二十年沒去過的地方。

經過米芝蓮三星餐廳「Core by Clare Smyth」，我隔著玻璃指住餐廳，對他說：

「原本今晚想同你喺度慶祝生日，不過都係訂唔到位。」

就算早兩個月也枉然。

下車第一件事，就是買眼鏡，之前說過每次去倫敦，都要光顧「Cubitts」一趟，連買眼鏡都要買英國牌子，果然崇英崇到底。

時間尚早，慢慢行去餐廳，「281 Portobello Green Arcade」，記得第一次去倫敦的時候，在Portobello Road流連忘返，其後兩三年繼續在此地探索，沒有google map/即時上網年代，所有資訊都是靠雜誌，或者靠自己誤打誤撞。

曾經在一間專買潮牌的時裝店，發現當時大熱的Air Woven，不用食炒價，非常老實，但我錯過了。

曾幾何時，APC仍是小眾喜愛的時裝牌子，由郵購到網上，實體店的位置例牌不太就腳（可能都唔算遠離市中心，總之唔係咁輕易去到）那個年代尚未被I.T收購，香港店位於雲咸街地舖，及後上樓，行上去始終都要點腳骨力；倫敦店就開在Notting Hill，坐地鐵的話有排行。

曾經在市場用£10買過件皮褸，曾經用不到£20買過條501，雅俗共賞，真的是好地方。

說回照片中的商場，當時的感覺，很像初期的尖沙咀百利，闊別超過二十年，行入去其中一間唱片店，全部都是買舊黑膠，小寶說在此買過卡式帶。

臨近收舖，匆匆地看有甚麼心頭好，見到唱片架上的label有Aphex Twin，心想似乎會有收穫。

因為想補購當年他的一張EP，即是Richard James本人個頭key上去大胸女郎封面的那張「Windowlicker」。

一揭開，空空如也。

在商場兜了一個圈，雖然黃昏已經全部關門，但感覺這裡多年來變化不太大，反觀百利由昔日的潮流熱點，變成今日與金都無異的娘味。

十月尾的倫敦黃昏六時一刻，天色已漸沉，落日如霧燈，我們行去餐廳途中，卻一起哼著深深深。

請不忘讚好我的專頁：https://www.facebook.com/foodiesmashingpumpkins