要是硬將點心分等級的話，蝦餃一定是大婆，燒賣永遠生成二奶命。
粉果，無奈地淪為妾侍。
試想一下，以前上茶樓飲茶，賣點心的阿姐，大叫蝦餃，燒賣。記住，是蝦餃燒賣，而不是燒賣蝦餃，排名一向分先後。
若然粉果與蝦餃燒賣，放在同一架點心車賣，只淪為敬陪末席的配襯品，蝦餃被秒殺，燒賣是次選，粉果？揀無可揀都未必揀它，我不如等另一部車，看看有甚點心？
S：（我同你啱啱相反，我係好鍾意食粉果！連涼茶舖果啲＄5兩隻都殺！）
我：（其實，我唔係唔鐘意粉果，只係上茶樓飲茶，佢從來唔會係我首選，有時候食完蝦餃，燒賣，見到魚翅餃，又整一籠，糯米雞，又整一隻，仲點食得落吖？）
S：（講番十多年前，老豆帶我去太子鳳城食飯，食過我平生第一隻，亦係最好食的粉果，就係炸粉果！）
S沒有說錯，太子鳳城的炸粉果，先浸在清鮮的上湯數秒，帶著湯汁的微脆感覺，連同豐富的餡料一次過晒冷，真的妙不可言。
驚覺，我真的不是不愛粉果，只是像愛情一樣，要講求timing。
往往去到吃到飽的地步，才遇上它，像有另一半的時候，遇上比另一半與我更投契的她。
當年我與S在網上某newsgroup結緣，品味相若，大家同樣喜歡英國文化，尤其是談到音樂，更是滔滔不絕。
只是在足球上處於對立局面，她捧利物浦。
剛剛點了潮州粉果，S以迅雷不及掩耳的速度，拿了兩隻，剩下一隻給我。
S：（你食你個蝦餃啦！）
我：（都好，男人老狗，食得多潮州粉果，條X會緊咗！）
S：（DIU！）
潮州粉果，除了涼茶舖，小食店亦源源不絕供應，當然不是自家製，大多用冷凍貨來應客。
其實，蒸熟之後，味道上的差異不太大，外皮一律地厚，餡料不外乎是肉粒，沙葛，蔥粒之類。沾些辣油，頓成天下美味。
直至去到沙士爆發那一年的某月某日，到訪佐敦新填地街的彩龍煲仔粥，那一記晶瑩剔透的外表，包著是層次分明，有深度的內涵，價錢與小食店賣的一樣，＄5兩隻。
只見店主不停地包粉果，貨真價實，童叟無欺，自此，不時上門光顧，吃個粉果，吃碗豬骨粥。
一心想帶她來見識這位隱世粉果高人，S總以要拍拖，沒時間應約而婉拒，漸漸地，大家沒有再聯絡。
後來，彩龍搬到去渡船街一帶，並改名為好客緣再戰江湖，粉果依舊，價格全非，由彩龍時代的＄5兩隻，變成＄15三隻。可惜，不久之前亦已關門大吉。
當初還為這段本來可以發展下去的友誼，最後無疾而終，感覺無助，落寞。
時間，早已沖淡了一切，年前在Facebook與她重遇，由飲夜茶的腳，變成只在Facebook交流的朋友，已作人妻的她，再找不到藉口約會。
現在飲夜茶，吃著潮州粉果，還是想起當年的S，還是條X緊咗。
沒有留言:
張貼留言