政府一聲號令禁晚市堂食，打亂晒我嘅陣腳，好幾場期待已久嘅飯局，被逼取消。
除咗大坑扒房之外，仲有四圍留家廚房飯局。
明知晚市已經被禁，飯店職員依然打電話俾我，提醒一下，順便推銷佢哋嘅茶市。
（等我定咗時間再打嚟訂枱啦。）我咁樣回應。
靚女朋友KL突然話想食真真正正嘅灌湯餃，咁啱呢度又有，時間又夾得到，即刻打電話訂枱。
外面大多數地方，食到嘅所謂灌湯餃，其實只係浸湯餃，好似碗咁大嘅餃子，浸喺上湯裡面就算，呃鬼食豆腐；現時喺香港可以食到名符其實灌湯餃嘅地方，真係唔多，嗰啲點心舖就肯定食唔到，咁其他酒樓中菜廳呢？
好多年前，喺陸羽食過蟹黃灌湯餃，除咗湯之外仲加埋蟹黃，非常之震撼，當然我都好耐無去，唔知而家仲有無。
兩間正牌鳳城，太子（已結業）店就浸湯，北角店就係灌湯，兩間蓮香，最老字號嗰間就浸，最後生嗰間就灌。
以上係我食過為準。
翠園偶然都有供應，但係美心㗎喎，你仲去幫襯？？
平日中午嘅留家廚房，因為每枱只限坐兩人，所以坐滿都一樣好靜局，對於食客嚟講，有咁闊落環境，靜靜地一盅兩件話當年，都咪話唔盞；但係對於飯店嚟講，叫晒救命啦。
穩陣起見，訂枱嗰陣留住兩隻灌湯餃先，萬一有咩嘢差池，靚女朋友嬲咗我，咪死？
銀色托住飽滿嘅灌湯餃，小心翼翼拎起，怕整穿個皮，輕輕一咬，熱辣辣嘅湯汁一湧而破，餡料加入一絲絲嘅蟹肉，提升咗本身嘅鮮甜味。
最純真嘅滿足表情，勾畫喺塊臉上，不經意擺出一副冧死人個樣，唔使揖揖揚揚，食過好嘅，怕咩俾人知？
都好耐無食過鳳凰煎米雞，靚女朋友未食過，我就循例介紹一下：（其實就係煎糯米雞。）
第一次食，喺澳門陶陶居，差唔多廿年前嘅舊事，一食難忘，返到香港想食，先發覺好少地方有。
一係去超市買隻急凍糯米雞，叮熟之後落鑊煎，一係就直接啲，去快餐店買隻現成，落鑊煎。
結果都係煎得無咁好。
表面同飯焦一樣咁脆，豐富嘅內餡，呢啲錢，都係出街俾人賺下好喇；鹹肉糭又好，糯米雞又好，食過煎嘅，返唔撚到轉頭。
我話嘅。
我係好鐘意一啲浸過湯嘅炸嘢，油炸鬼啦，炸粉果啦，呢日嚟一碟上湯粉果，浸一浸先食，貪佢有種淋淋地脆脆地嘅感覺。
香辣嘅冬陰功，滲入鮮竹卷，辣辣地，幾惹味，算係有啲新意。
呢度點心叫法夠靈活，有啲可以叫兩粒，譬如一籠點心，可以要兩粒蝦餃，兩粒燒賣，價錢都係除番條數。
飲茶首選點心，非蝦餃莫屬，留家出品，有齊蝦、豬肉、荀絲，只係蝦餃皮潺咗啲。
松露燒賣皇，肉質鬆軟香甜，松露香夠突出。
百花釀魚肚嘅精粹，始終落喺吸晒味嘅魚肚身上，當然，彈牙鮮甜的魷魚膠，唔食你就笨。
純粹想食煎蘿蔔糕，香甜蘿蔔絲之外，仲有臘味香，可惜辣椒醬唔係用余均益。
飲茶送報紙，係我多年來嘅習慣，風雨飄搖嘅大時代，令到好多人重拾睇報紙嘅興趣，希望唔好淨係得三分鐘熱度啦。
一海之隔嘅逸東軒，最近成為飲茶熱門地點，賣＄38款點心，惹嚟同路人爭先恐後嚟懲罰，米芝蓮一星級中菜，飲餐茶兩舊水一個人，抵啦。
呢度曾經攞過米芝蓮一星，消費其實同逸東軒差唔多。
沒有留言:
張貼留言