與her在長沙灣見面，這是我的成長之地，也算叫做一盡地主之誼。我：「年頭我哋先喺吉祥寺食過拿坡里意粉，今次就帶你去食返燴意粉。」
同一條青山道，最常去是「金園」，我中學年代已經光顧的「新華」，就已經很多年沒去，看回網誌的紀錄，對上一次是2012年。
站在長發街，我交由her決定去那一間。
結果選擇了後者。
可能是比較有點歷史，有閣樓的茶餐廳，現時已經不多。
中午十二點半來到，閣樓沒有位，坐下面卡位也不失興致。
「我喺升中一嗰年搬入嚟長沙灣，住喺隔離發祥街同青山道交界，所以有時屋企人會嚟買麵包蛋撻。」
我一邊飲住杯味道很淡的奶茶，一邊道出我與這間茶餐廳的緣份。
Her不太肚餓，只點一杯鴛鴦，一人一隻酥皮蛋撻，應該是出爐不久，新鮮熱辣，皮酥脆蛋香甜滑溜。
「呢個真係由細食到大嘅味道。」
遊客們熱愛的「Bakehouse」，他們覺得香港的蛋撻就是這樣子，但作為在香港活了半個世紀的大叔而言，不論是酥皮或餅皮蛋撻，這才是我們的香港味道。
除了出爐麵包蛋撻，很old fashion的生日蛋糕之外，最有印象的始終是燴意粉。
但看到個賣相，再吃下去的感覺，一味得個茄汁酸，沒有鑊氣，牛肉與意粉分離，老死不相往還，再加上賣＄62一碟，飲品要另外叫，＄25一杯凍奶茶。
不論是味道與價錢，金園贏不止一條街。
Her：「不如再去金園食過？」
「可惜我已飽到無力溝貨，只能你下次再回港嘅時候，一齊收復失地。」我一臉無奈地說。
行到去金園門口，生意興隆，原定在門外等巴士去太子，最後繼續沿住青山道散步。
「呢間戰前唐樓，以前是燒味店，有夜茶飲。」
「呢度就係我舊居。」
「呢間機舖，以前叫做阿拉丁，我成日去。」
「呢間宇宙商場，以前地下有間和記電訊，我人生第一部call機就喺度開，再之前有間賣鹹濕嘢嘅舖頭。」
「呢間茶餐廳以前個位，係U2時裝店，我第一件U2外套就喺度買。」
「唔好睇而家天悅廣場死氣沉沉，以前真係好旺㗎。。。」
一條青山道，彷彿是壓縮了我中學年代的回憶。
新華茶餐廳：長沙灣青山道334號地舖
沒有留言:
張貼留言