站在男人四十之前，驀然回首，是回味，還是不堪？
年紀相若的朋友／舊同學／同事，相繼成家立室，有些的兒女，已經拿成人身份證。
如果以這個男人必須成家立室，修身齊家平天下的既定方程式，去審視我的人生，是否一無是處？
你睇我好，我睇你好，反而有些朋友覺得我可以喜歡去那裡，就去那裡，暗地裡羨慕。
E：（好啦，終於捱到個仔上大學，但係我再無精力好似你咁，郁啲就去呢度果度，只係一年一度，同埋屋企人去日本滑雪咋。）
K：（我而家又供緊樓，去咗我每個月一半人工，個仔仲讀緊小學，真係郁都郁唔到。）
說起這位K，多年前有段時間與他很熟，熟到可以一起逛街，尤其是唱片店。
他當時住在港島，工作地點也在港島區，一年365日，過九龍的次數，一隻手指數得晒。
有次我們在HMV買唱片，見到心儀的唱片，價格偏高，想起旺角信和的小店，同樣有這張唱片，但是價錢便宜得多。
K：（時間即係金錢，要我專程搭車去買唱片，唔好啦，我寧願在HMV比多三十元。）
當時，大家都是剛出來社會做事，大家都是不折不扣的窮L，直到今天，我仍是一條窮L，而他在數年前淪為大西北樓奴，由本來的中產，變回一條窮L。
有一次，碰著K最喜歡的數位歌手出碟，我說反正你都會買，不如過旺角啦，加起上來，便宜過H記好多。
在信和大出血後，我帶他到旺角中心對面，老字號好旺角吃麵，知道他喜歡炸醬麵，便介紹他試試。
我：（試過你就知，同你食開的永華有點分別！）
小碟盛載著深紅色炸醬，與我們常見的京都炸醬有明顯的分別。
濃甜的醬，鬆化的肉絲，配上粗麵是好旺角的必殺技。
K大叫好味，說以後要多點來旺角。
後來，中間有段時間甚少聯絡，他做老襯也沒有通知我一聲。
最近他才向我解釋：（你知我同你無乜共同朋友，無理由叫你嚟同啲三五識七同檯，如果專登比張帖你，你都未必到，反而我怕你會覺得，我搏你投降輸一半，人唔到禮到，所以，真係唔好意思。）
我：（哈，講呢啲！）
有次相約交收，在佐敦麥文記見面，他對炸醬的執迷，依舊沒有改變。
K：（呢度啲炸醬麵還不錯，但係同永華比，都係差少少。）
我：（你到底一年食幾多炸醬麵？）
K：（唔。。。。一個月起碼都四次吧。）
我：（你仲有無去好旺角）
K：（有，偶然會去食，之後例牌過對面肥姐買生腸，再去天仁買杯茶。）
與K道別後，坐巴士回家，路過常去的麵店，走進去，想也不想，對侍應說：（唔該一碟炸醬麵！）
用余均益辣醬，做出來的炸醬，說是全世界最好的話，你一定吊柒我，好，當我偏心，凡是余均益就是皇道的道理，放在此炸醬上，連同煙韌彈牙的麵條，雪雪幾聲，碟底朝天。
有機會帶K來試，看看他吃罷此炸醬麵，會否吊柒我？
請不忘讚好我的專頁：https://www.facebook.com/foodiesmashingpumpkins
沒有留言:
張貼留言