土瓜灣榮光街的朱敏記桑拿菜，鑊鑊新鮮鑊鑊金，已經暫時取代了拍板小館，成為我這年來光顧次數最多的飯店。
月前我在歐洲旅行期間，朱敏記老闆娘whatsapp我：（幾時再來？又有新菜式呀。）
我：（等我，遲啲啦。）
上月尾友人J先生，之前他曾參與我在這裡的窮L飯局，委托我在此訂一檯，與數位朋友飯聚，事後他對我說：（呢次出品好過上次你搞果次飯局。）
人少少水準容易控制，這是真的，尤其是一間小店。
每年七月，都會為兩位部落客朋友，嬌肖的水晶與良品大叔KL慶祝生日，今次想麻甩一點，主人家想吃小炒。
我提議去朱敏記，主人家沒有異議，當作實之後，即刻whatsapp老闆娘：（今次又要麻煩妳喇，留張大檯，我再作實下人數，再搵妳寫菜。）
見面三分清，飯局前一晚，親身走到朱敏記打擾一下，找老闆娘安排一下菜單。
旋即她送我一杯大檸樂，心想：（呢次大檸樂喇。。。。。。）
月前我把今年情人節的飯聚，紀錄在我的報章專欄裡面，順便問問他：（果陣推咗呢度上報，生意有無好咗？）
老闆娘：（真係好多不得了呀。）
飯局當晚，全場爆滿，包括廂房。
一圍十六人，當中有些身形比較飽滿的朋友，難免要坐得逼人點。
趁人未齊（土瓜灣仲未有地鐵，對好多人嚟講，入嚟呢區係比較麻煩），不如偷跳先叫些小菜，椒鹽鮮魷香脆酥化，裡面的鮮魷鮮甜彈牙，另外的芝士卷亦然，芝麻的外表像北方的身段，包著是香濃的芝士餡，只是不夠拉絲，對相機食先靠呃LIKE來擦存在感的IG人來說，未免有點失望。
兩道小菜，佐酒是一流，是晚我成為了最大軍火供應商，一個人帶了四瓶酒。免收開瓶費，還不踴躍捐輸？
人齊了，未幾，老闆娘奉上賣相極之駕勢的花竹蝦刺身，連同炸蝦頭與壽包。
（呢個係生日菜，為兩位壽星而設。）老闆娘說。
有違以往的傳統，一開始就上生日菜，沒有燃點的蠟燭，沒有寫上祝福的字句，只有鮮美的花竹蝦刺身，正向大家招手。
炸蝦頭酥脆之外，還有蝦膏的甘香，鮮甜的花竹蝦刺身，與壽包同吃是嶄新的體驗。
燒牛肋骨上場，我對KL說：（你帶嚟果支智利Merlot，係時候出馬喇。）
但是有點阻滯，因為這瓶酒的酒塞已經溶爛，最後開了一個大窿，要問侍應拿個大杯，直接把紅酒倒進杯當作醒酒器。你在高級地方，沒有可能這樣玩，在街坊小炒店就點玩都得，用普通水杯來喝酒，是另一種草根的態度，不過我一早帶定私家杯應戰，哈哈。
牛肋骨的賣相依然精美得像西餐，肉質鬆軟兼充滿濃烈的肉香，配以Merlot是天生一對呢。
砌成心型七彩的炒鮑魚，珊瑚蚌與切件的鮑魚，再加露筍等配菜炒埋一碟，沒有太多調味，憑著鑊氣突出了食材的鮮美。
江南百花雞是招牌菜，土瓜灣之友果占苗說：（呢味喺呢度算係普通菜喇。）
對於未吃過此味的朋友，仍然有一份驚喜，街坊兼型男朋友BH，一邊吃一邊大讚。薄薄的雞皮脆而不膩，皮下的雞肉與蝦膠是整道菜的關鍵。
脆皮牛坑腩、脆皮豬手，同樣是朱敏記的招牌菜，差不多每次來都會吃，在此不贅。
整隻鹹鵝足夠十六個人分，鹹香之餘亦不會搶去鵝肉本身的味道，最後只吃剩骨頭，乾掉了一瓶酒。
全晚的素菜代表：扇影金蔬，上次情人節飯局已領教過孔雀開屏的鮮艷奪目，區區一碟素菜也要做得如此仔細，莫非是老闆娘對自己外表的要求，一一投射在飯店的菜式身上？對食客而言，尤其是像我的熟客，絕對是一件好事。
果占苗提議加碟煎韭菜餃，果然沒介紹錯，煎得香口不在話下，裡面的韭菜餡香甜多汁，水準真不賴。
一人一隻大連鮑魚，醬油下得重手了一點，味道有點過鹹。
壓軸的一道菜，越式燒魚，上年尾的窮L飯局已品嚐過，師傅先把魚肉起骨，再加上醬油去燒，剩下的魚頭魚尾拿去炸，作為這道菜的裝飾。
入口啖啖肉，充滿醬油香的魚肉，炸得酥脆的魚頭，是精華所在，嫩滑的魚肉夾著膠質，又喝光杯中的威士忌。
老闆娘孜孜不倦創作新菜式，每次光顧也有驚喜，大檸樂／大檸茶固然喝得痛快，免收開瓶費是一大優勢，最最最重要的是，價錢非常公道。看看賬單，簡直便宜得發笑，老闆娘，妳計少了我們的錢？
見到兩位壽星真情流露，一臉滿足，我也放下心頭大石了。
上年尾在此的窮L大局連開五圍，又美酒又美食又有卡拉OK唱，不如今年再接再勵，再搞一場？
有興趣就舉手。
朱敏記桑拿菜：土瓜灣榮光街6-8號地舖
沒有留言:
張貼留言