三一餃子（女人街）：從過去到現在

從白田到中環，走創作路線的「三一餃子」，最近在旺角女人街開分店，就在經常排長龍的「一生懸麵」隔離。

從白田的玫瑰餃子，到「阿布泰」都可以買到的蒜芯豬肉餃，有姿勢有實際，沒有為創作而創作得出來的三不像。

新店的面積較中環店大，某晚在門外見到裡面仍有位，即刻行入去。

餐牌內除了餃子，亦有一些炸物，甚至是關東煮可選；餃子有幾種做法：煎餃、湯餃、大阪燒、抄手。

當中對大阪燒最有興趣，是日以蒜芯豬肉餃擔正，一客有十隻，＄56。

煎餃面頭的脆皮，放上木魚碎、紫菜碎、蛋黃醬、大阪燒醬汁，外表打扮得維妙維肖，蒜芯豬肉的辛辣香甜味道，對我當然不陌生，名符其實皮薄餡靚，配以大阪燒的甜甜地，與及木魚碎的清香，兩者成功地連線。

餐牌內有一句：「有時剩係想食碗麵，真係咁難咩？」

我們香港人有句俗語：「搞撚掂，食碗麵。」

已淪為阿嬸的千嬅，年青的時候，高呼：「今天不夠電，可否賞個麵。」

我就這樣想：「無論世事常變，都是想食碗麵。」

所以我經常食麵。

湯底有蝦味噌與鰹魚清湯兩款，麵條是烏冬與上海麵之爭，八款餃子揀其一，要埋溫泉蛋就＄60。

韭黃墨醉雞餃，嫩滑的內餡，醉香點到即止，太搶的話未必個個都接受，尤其是小朋友；清鮮的鰹魚湯底，質感適中的上海麵，食一碗令人稱心滿意的麵，其實不難。

三一餃子（ 女人街）：旺角通菜街71號地舖

請不忘讚好我的專頁：https://www.facebook.com/foodiesmashingpumpkins