純屬即慶的飯局，全因街坊型男B先生，在Facebook出了一張相，背景是南山邨。
石硤尾之友C抗議：（去我地頭做咩唔搵我？）
我這頭塘邊鶴，加把口：（不如約埋去品香樓啦！）
另一位街坊，既聰明伶俐的美女H和應：（喂！賣飛佛喎，係咪先？）
超過七年沒踏足南山邨，＄1條魷魚還在，可是品香樓已經擴充營業，霸佔了數個舖位。
就算訂了位，也要等齊人才入座，我們四個人，包括我，沒一個準時，唉，怎預料到星期六的晚上，九龍城迴旋處依然塞車塞到仆街？
人山人海的品香樓，曾是眾多城大學生的共同回憶，起碼我認識的城大畢業生，十個有十個皆曾在此留下過足跡。
C：（你睇下，幫襯果啲全部都係外來客，無乜街坊客喇。）
也許這是成名的代價。
（當年我在你屋企隔離讀中學果陣，你應該仲未識行。以前學校隔離仲係七層大廈，南昌戲院全天候播鹹片。）我又恃老賣老，對著C說。
（哈哈，果陣應該學緊行。）
廿多年來，周圍的建築物沒變過，只是大力水手變成水手。
型男B姍姍來遲，他來到即刻有位，基本上，所有菜式可以即叫，除了。。。
鹽焗手撕雞，這個一定要在訂位時預留。
足夠四人份量，一絲絲手撕雞肉，肉質細嫩中見豪邁，就是那種不拘小節，味道鹹香而不過於霸道，更包括爽脆的雞腎，面頭的蔥絲加添一點辛辣，喝著自攜的威士忌，再叫一瓶青島，有別大家平時在酒店／米芝蓮餐廳般吹氣如蘭，奉身如玉，兩杯到肚，口水多過浪花。
益力多沙冰，美女H強力推薦：（識飲梗係飲呢啲！）
三杯益力多沙冰，一杯凍朱，乾一杯恭祝友誼。
咕嚕肉出奇地高水準，甜酸汁像保鮮紙一樣，緊緊保護著外脆內鬆化的排骨，入口酥脆之餘，恰當的甜酸味道，惹來美女H即刻叫碗白飯。
南乳炸豬肉夠肉地，香脆的豬皮帶有膠質，女生固然要吃多一點，男生亦然，尤其是像我的大叔，與身邊貪靚的型男B，採豬手補陽氣，方能人帥真好。
膽固醇爆燈的黃金魷魚，雖未去到珠江酒家般極致，但甘香的鹹蛋黃，不吝嗇地重重包圍著鮮甜彈牙的鮮魷。自攜的艾雷島獨立宣言，Bunnahabhain 7 yo的年青，剛烈，足以對此鮮魷作出制衡。
香蒜黃金蝦做得香口惹味，送威士忌也好，送青島也好，有好朋友，甚麼酒都是好酒。看似非常老土的論調，但這是事實。
吃了以上菜式，加一瓶青島，不知道有沒有收我＄20開瓶費，總之埋單差＄2便＄700，平均每人＄175。
與街坊共聚，總有一份莫明的親切感，畢竟出來做事之後，很難再找到與我住在附近的朋友，你估像以前讀書時代，同學仔皆住在同一區，隨時可以約出來打波，打機，飲下午茶？
下一餐，回土瓜灣打邊爐，OK嘛？
品香樓中西風味餐廳：石硤尾南山村南豐樓平台商場 204-205平台, 210-213號平台
沒有留言:
張貼留言