A君請我吃生日飯，地點例牌由我定。
（budget？）我循例問一句。
（我係窮L，你明嘅。）A君道。
上年在深水埗吃小炒，今年就火鍋？
（想試火鍋撚好撚耐，不如就呢間啦！）我提議。
相隔數日，A君說：（間嘢好爆，最早都要晚上九點。）
我沒問題，反正第二天放假。
（唔係喇，KK話想早啲開始，有無第二間？）A君問。
（就隔離果間啦。）我說。
為食仔火鍋專門店，位於旺角白布街，周一晚上七點半，坐無虛席，店外還有不少食客正在等候。
（就算訂咗位都要等。）店員說。
反正他們遲到，我不介意等多一會。
十五分鐘後，店員問我：（而家有張長檯，不過要搭檯，你OK嘛？）
唔。。。。我再等多一會，他們還未到。
最終，等了大約五十分鐘，才安排入座，記著，我們是訂了晚上七點半三位。
眼見有很多沒訂位的客人走來拿位，不知道要等多久了。
KK說之前去過火鍋撚與這裡，他提議來個龍蝦鍋，我當然沒有異議。
全個餐單之中最貴的湯底，＄298，有原隻開邊龍蝦，蜆，蝦，豆腐，與及其他配菜。
A君不太吃牛，三個人，叫一碟牛肉便可，另外叫些餃子，肉丸之類，保証吃得飽。
火鍋店有生啤供應，不過只有好加頓，寧願先來兩瓶哈爾濱啤酒。
A君高呼：（哈爾濱啤正呀！）
上年初，我與她在不遠處的Tap The Ale Project，一起喝精釀啤，如今喝著哈爾濱啤，雖然火鍋店沒有提供比較像樣的玻璃杯，只以膠茶杯應戰，感覺一樣地高興。
待龍蝦湯底滾起，急不及待先喝一口，濃郁鮮甜的龍蝦香味盡流露，海蝦質素不俗，龍蝦肉亦表現出應有的態度，爽甜可人。
牛頸脊入口無渣，嫩滑中帶着肉香與油香，鑑於A君少吃牛，如是者我與KK包辦大部份。
KK帶來的Bruichladdich威士忌，強烈的泥煤風，配海鮮一流。
鮮蝦雲吞與韭菜餃，正常水準，當然自家製又會加多一點誠意分。
紫菜響鈴輕輕灼數秒，微脆之間的口感固然微妙，加上紫菜之後，更有睇頭。
齊齊笑哈哈，與黑松露孖寶，在平淡的蝦丸與墨魚丸之中，滲進一點玩味的元素，像黑松露，蟹子之類，趣味盅然，味道亦佳，食客當然吃得開心。
湯底剩下三份一，裡面的蜆，還有很多沒有開口，奇怪。
勉強無幸福，加了湯底後再戰，來一碟皇帝菜。
埋單時發現，本來跟海鮮鍋的黑松露飯，一直沒有送來。我問店員：（乜有黑松露飯送？）
店員答：（係呀，你仲要唔要？）
我：（唔使喇，都埋單喇。）
店員連忙說不好意思，一個人睇全場，難免有所甩漏。
銀碼為一千二百多，除開每人四百，但A君與KK請客，他們每人付六百，絕不是窮L價錢。
感謝他們請客之餘，心中亦有愧，畢竟是我提議來這裡，唯有下次我請他們吃好西。
離開之時差不多晚上十一時，火鍋店外面，依然有很多人等候入座。
（星期一晚都咁旺？）我有點難以置信地說。
KK：（呢度啲生蠔，前排＄10隻，而家就＄20，蜆煲就九點半後有特價。）
莫非，是特價蜆煲，惹來食客一擁而至？
回家後上Facebook，赫見飲食記者兼vlogger的Hello Pinkey，剛拍了一段片，就是介紹這個宵夜時段特價蜆煲。
噢，原來又是她的好事，既然拍片的效果遠高於寫文，不如我又拍埋一份。
唉，今時今日，文字越來越廉價，別人個專頁成七萬幾個讚好，而一路靠文字行走江湖的我，出盡飲奶力都只得一萬二千個讚好，收得皮了。
為食仔海鮮火鍋專門店：旺角白布街4號地舖
沒有留言:
張貼留言