另一間對上一次到訪，已經是2011年的食肆，藍地的「季季紅」，曾幾何時連開分店，最後還是只剩下藍地的老巢。
今年的冬至飯，因為要遷就家人，於是我又要入到屯元天，上次在嘉湖會所的經驗麻麻，元朗的「大圍小館」又已結業，屯門三聖一帶的海鮮酒家，我又未能抽空早一點去買海鮮。
不如就季季紅啦。
當日下班從紅磡坐260X，去到屯門轉68A，一落車過對面便是了，或者會慢過坐西鐵轉輕鐵，勝在有位坐兼有個USB叉一叉電。
訂了晚上八點，頭一輪的食客已作鳥獸散，第二輪就只得三幾枱。
正因如此，上菜的速度好快，蝴蝶腩豬肺菜乾湯，四個人分到多過一碗，也不用一百大元，淨吃滑得彈破的豬肺，也值回票價。
人數不足以吞下一隻釀乳豬，想叫碟乳豬又不能叫例牌，可能當晚的情況有點不同吧，但我見到餐牌寫住乳豬是有例牌份量可選的。
算罷，叫碟例牌燒肉，外皮烤得脆卜卜，沒有過硬的情況，皮下的脂肪偏少，肉質比較實在。
花膠鮑魚大勝雞煲，價值百多元的身價，花膠與鮑魚一定不會用靚貨，在濃郁的醬汁之下，普通貨色也頓時生色不少。
加埋瑤柱炒碟豆苗，始終是秋冬蔬菜的首選。
興之所致，來個上湯龍蝦配伊麵，三百多元一客，質感爽中帶點嫩，上湯略帶杰身，但沒有過火位，伊麵底亦恰如其份，安穩地與龍蝦組成一對，最後我們吃得乾乾淨淨。
這頓冬至飯，只花了大約50分鐘，埋單前要看看巴士APP，下一班巴士會幾時到。
剛好有一班車在5分鐘後到站，時間啱啱好。
回到2011年到訪的時候，當時我搞了一場窮鬼飯局，每位百多元的消費，吃到捧腹而回；未來日子有沒有機會，在此再搞一局？
應該不會了。
費時比某某話我跟佢口水尾啦。
季季紅風味酒家：屯門藍地大街1號
沒有留言:
張貼留言